काठमाडौं, फागुन ६, २०८२ (फेब्रुअरी १८, २०२६) : काठमाडौंको डिल्लीबजारस्थित सफ्टवारिका कलेज अफ आईटी एण्ड ई-कमर्समा 'रोबोट्रोनिक्स समिट २०२६' (Robotronics Summit 2026 in Nepal) भव्यताका साथ सम्पन्न भएको छ। "डिजिटल एभरेष्ट: स्केलिंग इनोभेसन बियोन्ड बोर्डर्स" भन्ने मूल नाराका साथ आयोजित यस समिटले नेपालमा पहिलोपटक उद्योग-केन्द्रित र प्रयोगात्मक रोबोटिक्स शिक्षाको आवश्यकतालाई उजागर गरेको छ।

कार्यक्रममा प्रमुख अतिथिका रूपमा बोल्दै नेपाल चेम्बर अफ कमर्सका निवर्तमान अध्यक्ष राजेन्द्र मल्लले सन् २०३० सम्मको प्रविधि बजारलाई ध्यानमा राख्दै नेपाली विद्यार्थीहरू ह्युमनोइड्स र डिजिटल ट्विन्स जस्ता अत्याधुनिक प्रविधिमा पोख्त हुनुपर्ने बताउनुभयो। उहाँले 'रोबोटिका कलेज' को उद्योग-मैत्री पाठ्यक्रमले दक्ष जनशक्ति उत्पादनमा ठूलो सहयोग पुर्‍याउने विश्वास व्यक्त गर्नुभयो।

क्यान महासंघका वरिष्ठ उपाध्यक्ष तथा वान कभरका सीईओ चिरञ्जीवी अधिकारीले "रोबोटिक्स जसले रोजगारी दिन्छ" (Robotics That Gets Hired) भन्ने अवधारणामा जोड दिनुभयो। उहाँले भन्नुभयो, "हामीलाई केवल सैद्धान्तिक ज्ञान भएका जनशक्ति होइन, बरु उद्योगको माग अनुसार वास्तविक उत्पादन (Real Products) तयार गर्न सक्ने दक्ष जनशक्तिको खाँचो छ।"

अटोनोमस रोबोटिक्सका विज्ञ युधिष्ठिर गौलीले स्वास्थ्य सेवा, ढुवानी र उत्पादनमूलक क्षेत्रमा रोबोटिक्सको बढ्दो महत्वबारे आफ्नो अनुभव साट्दै नेपालमा पहिलोपटक 'रोबोटिका इन्स्टिच्युट' को उद्योग-आधारित पाठ्यक्रम शिक्षण संस्थाहरूमा भित्र्याइएको जानकारी दिनुभयो। सफ्टवारिका कलेजका अध्यक्ष विज्ञान श्रेष्ठले समिटमा 'टेक शोकेस' र 'करियर जोन' मार्फत विद्यार्थीहरूले विश्वव्यापी रिमोट जब्स र इन्टर्नसिपका अवसरहरूबारे प्रत्यक्ष जानकारी पाएको बताउनुभयो। उहाँले आगामी दिनमा पनि कलेजले यस्ता प्रयोगात्मक कार्यक्रमहरूलाई निरन्तरता दिने प्रतिबद्धता व्यक्त गर्नुभयो।

विश्व बैंक समूहको #Jobs Agenda सँग तालमेल मिलाउँदै समिटले पूर्वाधारमा लगानी, व्यवसायिक वातावरण निर्माण र निजी पुँजी परिचालन मार्फत रोजगारीका अवसर सिर्जना गर्ने लक्ष्य राखेको छ। कार्यक्रममा देशभरका विभिन्न कलेजका विद्यार्थी, प्राज्ञिक व्यक्तित्व र प्रविधि विज्ञहरूको बाक्लो उपस्थिति रहेको थियो।