मेलबर्न (अष्ट्रेलिया) । केही वर्षअघिसम्म मोबाइलबाट सामान्य भिडियो बनाउने युवा थिए हृदय शर्मा। अहिले भने उनी टिकटकमार्फत विभिन्न देशका दर्शकमाझ आफ्नो छुट्टै पहिचान बनाउने प्रयासमा छन्। नेपालमा जन्मिएर हाल अष्ट्रेलियाको मेलबर्नमा बसोबास गर्दै आएका शर्माले सामाजिक सञ्जाललाई केवल मनोरञ्जनको माध्यम मात्र नभई आफ्ना अनुभव, संस्कृति र पहिचान प्रस्तुत गर्ने प्लेटफर्मका रूपमा उपयोग गरिरहेका छन् । हृदयको डिजिटल यात्रा कुनै ठूलो लगानी वा व्यावसायिक टोलीबाट सुरु भएको होइन । अरू धेरै युवा कन्टेन्ट क्रिएटरझैं उनले पनि मोबाइल क्यामेराबाट भिडियो बनाउन थाले ।

सुरुमा मनोरञ्जनका लागि बनाइएका भिडियोले विस्तारै दर्शकको साथ पाउन थालेपछि उनले कन्टेन्ट निर्माणलाई निरन्तरता दिए । अहिले उनका भिडियोमा नेपालीपन, अष्ट्रेलियाको जीवनशैली, आप्रवासी अनुभव, मनोरञ्जन र समसामयिक डिजिटल ट्रेन्डको मिश्रण देख्न सकिन्छ । यही कारण उनका सामग्री दक्षिण एसिया, अष्ट्रेलियालगायत विभिन्न देशका दर्शकमाझ पुग्न थालेका छन् । हृदयका अनुसार डिजिटल क्षेत्रमा टिकिरहन प्रतिभा मात्रै पर्याप्त हुँदैन । निरन्तरता, धैर्यता र दर्शकको रुचि बुझ्ने क्षमता उत्तिकै आवश्यक हुन्छ। "कन्टेन्ट सिर्जना गर्नु भनेको भिडियो पोस्ट गर्नु मात्र होइन," उनी भन्छन्, "हरेक सामग्रीसँगै नयाँ कुरा सिक्ने, आफूलाई सुधार्दै लैजाने र परिणाम तत्काल नआए पनि निरन्तर प्रयास गरिरहने प्रक्रिया हो ।" उनी आफ्नो कन्टेन्टमार्फत नेपाली संस्कृति र आप्रवासी जीवनका अनुभवलाई अन्तर्राष्ट्रिय दर्शकमाझ पुर्‍याउने प्रयास गरिरहेका छन् ।

नेपालबाट अष्ट्रेलियासम्मको यात्राले आफूलाई दुई फरक संस्कृतिलाई नजिकबाट बुझ्ने अवसर दिएको र त्यसैलाई सिर्जनात्मक रूपमा प्रस्तुत गर्न खोजिरहेको उनी बताउँछन् । "म चाहन्छु, मेरो कन्टेन्टले मानिसलाई जोडोस् । आप्रवासी पृष्ठभूमिबाट आएको व्यक्तिले पनि मेहनत र निरन्तरताका आधारमा अन्तर्राष्ट्रिय डिजिटल क्षेत्रमा आफ्नो स्थान बनाउन सक्छ भन्ने उदाहरण बन्न सकियोस्," उनी भन्छन् । हृदय अहिले टिकटकमा मात्रै सीमित छैनन् । उनले अन्य सामाजिक सञ्जालमा पनि आफ्नो उपस्थिति विस्तार गरिरहेका छन् ।

आगामी दिनमा अन्तर्राष्ट्रिय कन्टेन्ट क्रिएटर, सञ्चारमाध्यम र विभिन्न संस्थासँग सहकार्य गर्दै संस्कृति, जीवनशैली, मनोरञ्जन र सामाजिक प्रभावसँग सम्बन्धित सामग्री उत्पादन गर्ने उनको योजना छ । उनका अनुसार सफलताको मापन केवल फलोअर वा भ्युजको संख्याले हुँदैन। दर्शकको विश्वास, आफ्नो पहिचान र समाजमा सकारात्मक प्रभाव छोड्न सक्नु नै दीर्घकालीन सफलताको आधार हो ।

सामाजिक सञ्जालले विश्वलाई नजिक ल्याइरहेको वर्तमान समयमा हृदय शर्माको यात्रा डिजिटल माध्यममार्फत नेपाली युवाले विश्वव्यापी पहिचान बनाउन सक्ने सम्भावनाको एउटा उदाहरण बनेको छ । समर्पण, निरन्तरता र सिर्जनशीलताका आधारमा अघि बढेका उनी अहिले अन्तर्राष्ट्रिय डिजिटल समुदायमा आफ्नो ठाउँ बनाउन प्रयासरत छन् ।