पर्सा - प्रसिद्ध युवा व्यवसायी एवम् आरपी ग्रुपका सञ्चालक रूपेश पाण्डेले ०८४ सालमा पर्सा क्षेत्र नं. ३ बाट प्रतिनिधि सभा सदस्यको चुनाव लड्ने घोषणा गरेका छन्। आफ्नो व्यवसायिक सफलता र सामाजिक सेवामा सक्रिय योगदान दिँदै आएका पाण्डे पछिल्लो समय गाउँ-ठाउँका नागरिकका समस्या समाधान गर्न निरन्तर लागिपरेका छन्।

स्थानीय बासिन्दाको सुख-दुःखमा सधैं साथ दिँदै आएका पाण्डेलाई नागरिकले राजनीतिक नेतृत्वमा देख्न चाहेको बताउँदै आएका छन्। पाण्डेले भने, "जनताको साथ र विश्वासले मलाई अझै उत्साहित बनाएको छ।

पर्सा क्षेत्रको विकास र समस्याको समाधानका लागि म अब राजनीतिक नेतृत्वको माध्यमबाट योगदान दिन चाहन्छु।" सामाजिक र आर्थिक समस्यामा निरन्तर चासो पर्सा क्षेत्र नं. ३, मानिकपुर वार्ड नं. २ का स्थायी बासिन्दा पाण्डेले आफ्नो क्षेत्रमा विकासको अभाव रहेको गुनासो गरेका छन्। सडकको अवस्था, खानेपानीको अभाव र कृषिजन्य उत्पादनको बजारीकरण नहुँदा किसान समस्यामा रहेको उनले बताए।

"हाम्रो क्षेत्रका जनताले दुःख पाएका छन्, तर समाधानका लागि पहल गर्ने कोही छैन। म यो अवस्थालाई परिवर्तन गर्न चाहन्छु," उनले भने। पाण्डेले गाउँ-गाउँ घुम्दै स्थानीय समस्या नजिकबाट बुझेका छन्। उनले समाजमा बढ्दै गएको मद्यपान, घरेलु हिंसा, र अन्य विकृतिबारे पनि चिन्ता व्यक्त गरेका छन्। "म समाजका विकृतिहरू घटाउन र सुधार ल्याउन प्रतिबद्ध छु," उनले जोड दिए।

पर्सा क्षेत्रको विकासप्रति दृष्टिकोण

पाण्डेले पर्सा जिल्लालाई व्यापारिक, आर्थिक र सामाजिक दृष्टिले सम्पन्न बनाउने उद्देश्य लिएका छन्। "हाम्रो जिल्लामा आवश्यक विकास भएका छैनन्। यसलाई परिवर्तन गर्न ठोस योजना र जनताको सहभागिता आवश्यक छ," उनले भने। पाण्डेको उम्मेदवारीले पर्सा क्षेत्रका जनतामा उत्साह छाएको छ।

बुढापाकाको आशीर्वाद र युवाको समर्थनले पाण्डेले चुनावमा जित्ने आशा राखेका छन्। "जनताको विश्वासले मलाई प्रेरित गरेको छ। म सबैको सहयोग लिएर पर्साको विकासका लागि अगाडि बढ्नेछु," उनले बताए।

पाण्डेको उम्मेदवारीले पर्सा क्षेत्रको राजनीतिक परिदृश्यलाई निकै रोचक बनाएको छ।