काठमाडौं, साउन । बेष्ट फाइनान्स लिमिटेडले वातावरण संरक्षण र दिगो वित्तीय प्रणाली प्रवर्द्धनका लागि ‘ग्रीन सेभिङ्स डिपोजिट प्रडक्ट’ सार्वजनिक गरेको छ। नेपाल राष्ट्र बैंकले ल्याएको ‘नेपाल ग्रीन फाइनान्स ट्याक्सोनोमी २०२४’ अनुरूप फाइनान्सले यो नयाँ योजना प्रस्तुत गरेको हो । उक्त योजनाअन्तर्गत ग्रीन सेभिङ्समा सहभागी हुने प्रत्येक ग्राहकको नाममा एक–एक बिरुवा रोपिनेछ ।

यसले ग्राहकलाई वित्तीय लाभसँगै वातावरण संरक्षणमा पनि प्रत्यक्ष योगदान दिने अवसर प्रदान गर्नेछ। बेष्ट फाइनान्सले वृक्षारोपण कार्यको व्यवस्थित व्यवस्थापनका लागि लायन्स इन्टरनेशनल डिष्ट्रिक्ट ३२५ एस नेपालसँग साझेदारी गरेको छ । सहमति पत्रमा बेष्ट फाइनान्सका प्रमुख कार्यकारी अधिकृत बीएन घर्ती र लायन्सका एरिया चिफ कोअर्डिनेटर चिन्तन वज्राचार्यले हस्ताक्षर गरेका थिए ।

कार्यक्रमअन्तर्गत गोदावरी नगरपालिका–१, गोदामचौरमा ५०० बिरुवा रोपिएको छ । वृक्षारोपण कार्यक्रम बेष्ट फाइनान्स, गोदावरी नगरपालिका, र लायन्स डिष्ट्रिक्ट ३२५ एस नेपालको संयुक्त आयोजनामा सम्पन्न भएको हो। उद्घाटन कार्यक्रममा गोदावरी–१ का अध्यक्ष श्रीराज थापा, बेष्ट फाइनान्सका अध्यक्ष प्रा. डा. रामजी गौतम, सीईओ बीएन घर्ती, लायन्सका विभिन्न पदाधिकारी र अन्य सहभागिता रहेका थिए। कार्यक्रमप्रति ५० भन्दा बढी लायन्स क्लबहरूले ऐक्यबद्धता जनाएका थिए ।

वृक्षारोपणका साथै जग्गा पहिचान, गोडमेल, संरक्षण, र पाँच वर्षपछि स्थानीय निकायलाई हस्तान्तरण गर्ने योजना रहेको जानकारी दिइएको छ । बेष्ट फाइनान्सको यो प्रयासलाई दिगो वित्तीय अभ्यास र सामाजिक उत्तरदायित्वको नमुना पहलको रूपमा हेरिएको छ । प्रमुख कार्यकारी अधिकृत घर्तीले भने, “ग्राहकलाई नाफासँगै प्रकृतिमा लगानी गराउने हाम्रो अभियान देशको हरियाली भविष्यतर्फको एक कदम हो ।”