गाेरखा । पूर्वप्रधानमन्त्री डा. बाबुराम भट्टराईले गोरखा–२ बाट आगामी निर्वाचन नलड्ने निर्णय गर्नु सामान्य राजनीतिक निर्णयभन्दा धेरै अर्थपूर्ण रूपमा हेरिएको छ। यो कदमलाई उनले ‘सीट राजनीति’भन्दा माथि उठेर लिएको साहसिक र दूरदर्शी निर्णयका रूपमा विश्लेषण गरिएको छ ।

७२ वर्षको उमेरमा डा. भट्टराईले आफूलाई अब व्यक्तिगत रूपमा सत्ता वा पदप्रति कुनै लोभ नभएको स्पष्ट पार्दै युवा नेतृत्वका लागि स्थान खाली गर्न चाहेको घोषणा गर्नु नेपाली राजनीतिमा दुर्लभ उदाहरण हो । सुनिश्चित जित हुने मानिएको निर्वाचन क्षेत्र छोडेर प्रतिस्पर्धाबाट अलग हुने उनको निर्णयले राजनीतिमा त्याग, उत्तरदायित्व र नेतृत्व हस्तान्तरणको सन्देश दिएको छ ।

राजनीतिमा सत्तालोलुपताको आरोप खेप्दै आएका नेताहरूको भीडमा डा. भट्टराईको यो कदमले उनलाई पदभन्दा विचार, व्यक्ति भन्दा पुस्तागत रूपान्तरणलाई प्राथमिकता दिने दूरदृष्टि भएको नेताका रूपमा प्रस्तुत गरेको छ । उनका समर्थक तथा विश्लेषकहरूका अनुसार यो निर्णयले नेपाली राजनीतिमा नयाँ राजनीतिक संस्कारको बहसलाई थप बल दिएको छ ।