काठमाडौं । शिवरात्रिको पावन अवसर पारेर धार्मिक, सामाजिक सद्भाव र राष्ट्रिय एकताको सन्देश फैलाउने उद्देश्यसहित राजधानी काठमाडौंमा आयोजना हुने ‘शिवरात्रि महोत्सव’मा आध्यात्मिक प्रवाचक राजानन्द माण्डव्यको प्रमुख प्रवचन रहने भएको छ । हिन्दु, बौद्ध र किराँत धर्मावलम्बीबीच आपसी सद्भाव, धार्मिक सहिष्णुता र राष्ट्रिय एकतालाई सुदृढ बनाउने लक्ष्यसहित आयोजना हुन लागेको उक्त महोत्सव २०८२ माघ २४ गतेदेखि फागुन ४ गतेसम्म काठमाडौँको पशुपतिनाथ गौशाला परिसरमा सञ्चालन हुनेछ । महोत्सव दैनिक बिहान ७ बजेदेखि बेलुकी ४ बजेसम्म चल्ने आयोजकले जनाएको छ ।

महोत्सवका प्रमुख आकर्षणका रूपमा राजानन्द माण्डव्यद्वारा आध्यात्मिक प्रवचन, श्रीशिवमहापुराण तथा श्रीमद्भागवत महापुराणको पाठपारायण, पूजा–अर्चना, दैनिक हवन, भजन–कीर्तन, १२ राशिअनुसार यज्ञमण्डप पूजा लगायत विविध धार्मिक तथा आध्यात्मिक कार्यक्रमहरू समावेश गरिएका छन् । राजानन्द माण्डव्यको प्रवचनमार्फत समाजमा आध्यात्मिक चेतना, नैतिक मूल्य र आपसी सद्भावको सन्देश प्रवाह हुने आयोजकको विश्वास छ ।

महोत्सवले सामाजिक एकता र राष्ट्रिय भावनालाई थप मजबुत बनाउने अपेक्षा गरिएको छ । महोत्सव माहाहृद परिवारको आयोजना तथा माहाहृद महिला समूहको सह–आयोजनामा रत्नोपल, काठमाडौंमा सम्पन्न हुने भएको छ । आयोजकले धार्मिक तथा आध्यात्मिक कार्यक्रममा सहभागी भई पुण्य लाभ लिन देशभरका श्रद्धालु भक्तजनलाई हार्दिक निमन्त्रणा गरेको छ ।