काठमाडौं । नेपाल चेम्बर अफ कमर्सले नेपाल सरकार उद्योग, वाणिज्य तथा आपूर्ति मन्त्रालयले आज देखि सुरु गरेको ‘मूल्य पारदर्शिता सप्ताह’ अभियानप्रति ऐक्यबद्धता जनाएको छ । मन्त्रालयले वैशाख २८ गतेदेखि जेठ ३ गतेसम्म देशव्यापी रूपमा उक्त अभियान सञ्चालन गर्न लागेको हो । चेम्बरले आइतबार जारी गरेको प्रेस विज्ञप्तिमा बजारमा उपलब्ध वस्तु तथा सेवाको मूल्यसम्बन्धी स्पष्ट, विश्वसनीय तथा पारदर्शी जानकारी प्रवाह गरी उपभोक्ताको अधिकार संरक्षण, स्वस्थ प्रतिस्पर्धाको प्रवद्र्धन तथा बजार प्रणालीप्रति आम नागरिकको विश्वास अभिवृद्धि गर्न अभियान प्रभावकारी हुने विश्वास व्यक्त गरेको छ ।

विज्ञप्तिअनुसार मूल्य पारदर्शिताले व्यवसाय सञ्चालनलाई थप जिम्मेवार, व्यवस्थित तथा उपभोक्तामैत्री बनाउन सहयोग पुग्ने अपेक्षा गरिएको छ । चेम्बरले सम्पूर्ण उद्योगी, व्यवसायी, व्यापारी, पैठारीकर्ता, सप्लायर्स तथा सेवा प्रदायक संस्थाहरूलाई आफूले बिक्री–वितरण गर्ने सम्पूर्ण वस्तु तथा सेवाको अद्यावधिक मूल्यसूची उपभोक्ताले सहज रूपमा देख्न सक्ने स्थानमा अनिवार्य रूपमा राख्न आग्रह गरेको छ ।

त्यसैगरी, चेम्बर सम्बद्ध सदस्य वस्तुगत संघहरू, जिल्ला तथा नगर चेम्बरहरूलाई मूल्यसूचीसहित उपभोक्तामाझ स्पष्ट सूचना प्रवाह गर्ने कार्यमा आवश्यक समन्वय तथा सहजीकरण गर्न अनुरोध गरिएको छ । चेम्बरले व्यवसायी र उपभोक्ताबीच आपसी विश्वास, पारदर्शिता तथा उत्तरदायित्व अभिवृद्धि गर्न यस्ता अभियान प्रभावकारी हुने उल्लेख गर्दै सम्पूर्ण व्यवसायीलाई अभियान सफल बनाउन जिम्मेवार र सक्रिय सहभागिताका लागि अपिल गरेको छ ।

चेम्बरका महानिर्देशक देवेन्द्र लामिछानेद्वारा हस्ताक्षरित उक्त विज्ञप्तिमा उपभोक्तामैत्री बजार निर्माणका लागि सरकार, निजी क्षेत्र, व्यवसायी तथा उपभोक्ताबीच सहकार्य अपरिहार्य रहेको धारणा व्यक्त गरिएको छ ।