काठमाडौं। काठमाडौंको ठमेलबाट एक चिनियाँ नागरिकको अपहरणमा संलग्न भएको आरोपमा पक्राउ परेका चार भारतीय नागरिकलाई पाँच दिन हिरासतमा राख्न जिल्ला अदालतले अनुमति दिएको छ।

जिल्ला प्रहरी परिसर, काठमाडौंका एसपी नवराज अधिकारीका अनुसार, अपहरणपछि भारततर्फ लैजाँदै गरेका आरोपितलाई मकवानपुरको भीमफेदीबाट नियन्त्रणमा लिइएको हो। हिरासतमा राख्न अनुमति पाएका आरोपितहरुमा भारत महाराष्ट्र प्रदेशका ३३ वर्षीय आशुतोफ दत्रेय, ३० वर्षीय अमोल खरमते, ४० वर्षीय असरफ युनुस शेख, र ३० वर्षीय अम्बास श्रीसत रहेका छन्।

अधिकारीले भने, "उनीहरुविरुद्ध अपहरण तथा शरीर बन्धकसम्बन्धी कसुरमा अनुसन्धान अघि बढाइएको छ। यो अवधिमा बयान लिने र अनुसन्धानका अन्य प्रक्रिया अघि बढाइनेछ।"

मंगलबार ठमेलबाट चिनियाँ नागरिक हराएको खबर प्राप्त भएपछि उपत्यका अपराध अनुसन्धान कार्यालयले अनुसन्धान थालेको थियो। ठमेल क्षेत्रको सीसीटीभी फुटेजमा चिनियाँ नागरिकलाई गाडीमा हालेर लैजाँदै गरेको देखिएपछि प्रहरीको ध्यान तानिएको थियो।

नाकाहरुमा कडाईका साथ जाँच गरिरहेका बेला मकवानपुरमा शंकास्पद गतिविधि पत्ता लागेपछि प्रहरीले गाडी नियन्त्रणमा लिएर चिनियाँ नागरिकलाई उद्धार गरेको हो। घटनाबारे थप अनुसन्धान भइरहेको प्रहरीले जनाएको छ।