काठमाडौं । नेपाली कांग्रेसका केन्द्रीय सदस्य अब्दुल सत्तारले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’माथि गोरखामा विकास नगरेको आरोप लगाउनु भएकाे छ ।

शुक्रवार गोरखा जिल्लाको आजरीकोट गाउँपालिका–२, खरीबोटमा कांग्रेसद्वारा आयोजित ज्येष्ठ नागरिक सम्मान तथा वनभोज कार्यक्रममा बोल्दै सत्तारले प्रचण्डको नेतृत्वमा चलेको सरकारले गोरखाका लागि ठोस काम गर्न नसकेको दाबी गर्नुभयाे ।

उहाँले भन्नुभयाे, “जनताको आवश्यकता सम्बोधन गर्न दलहरूले आँट गर्नुपर्छ, लोकतन्त्रविरोधी बन्ने छुट कसैलाई छैन ।” सत्तारले कांग्रेस र माओवादी केन्द्रबीचको अघिल्लो गठबन्धन सरकारले सन्तोषजनक काम गर्न नसकेको बताउनु भयाे ।

त्यस्तै, हालको कांग्रेस–एमाले गठबन्धन सरकारले पनि विकासलाई तीव्रता दिन नसकेको टिप्पणी गर्नुभयाे । स्थानिय तहमा निर्वाचित जनप्रतिनिधिहरूले चुनावमा जनतालाई दिएको आश्वासन पूरा गर्नुपर्नेमा उनले जोड दिनुभयाे ।

साथै, अन्य पार्टीहरूसँग पराजित भएका कांग्रेस कार्यकर्ताहरूलाई थप संघर्ष गर्दै आगामी निर्वाचनका लागि तयारीमा जुट्न सुझाव दिनु भयाे ।