काठमाडौं । नेपाल समाजवादी पार्टी (नयाँ शक्ति) को पदाधिकारी बैठक आज पार्टी केन्द्रीय कार्यालय, तीनकुनेमा सम्पन्न भएको छ । अध्यक्ष डा. बाबुराम भट्टराईको अध्यक्षतामा बसेको बैठकले वैकल्पिक राजनीतिको सशक्त मार्गचित्र अघि बढाउने रणनीति तय गर्दै महत्वपूर्ण निर्णयहरू गरेको छ ।

बैठकको प्रारम्भमा महान् शहीदहरूप्रति श्रद्धाञ्जली अर्पण गरिएको थियो । त्यसपछि पदाधिकारीहरूले आ–आफ्ना जिम्मेवारी र संगठनात्मक गतिविधिका प्रतिवेदनहरू प्रस्तुत गरेका थिए । बैठकले पार्टी अध्यक्ष डा. भट्टराईको हालैको भारत भ्रमणलाई नेपालको राष्ट्रिय हितमा केन्द्रित प्रभावशाली कूटनीतिक र राजनीतिक संवादका रूपमा मूल्याङ्कन गरेको छ ।

भ्रमणका क्रममा भारतीय शीर्ष नेतृत्व, कूटनीतिक निकायका प्रतिनिधि र सञ्चारकर्मीहरूसँग भएका छलफलहरूले नेपाल–भारत सम्बन्धमा सकारात्मक ऊर्जा थपिएको बैठकको ठहर छ । वैकल्पिक राजनीतिको जनसमर्थन बढ्दो क्रममा रहेको भन्दै, बैठकले “प्रशंसा अभियान” लाई तीव्र पार्दै संगठन विस्तार, प्रशिक्षण र सामाजिक परिचालनलाई देशव्यापी स्तरमा सशक्त रूपमा अघि बढाउने निर्णय गरेको छ ।

यसैगरी, पार्टीको स्थापना दिवस आगामी जेठ ३० गते राजधानी काठमाडौँमा भव्य रूपमा मनाइने भएको छ । स्थापना दिवसको अवसरमा वृक्षारोपण, सरसफाइ, श्रमदान, रक्तदान, स्वास्थ्य शिविरजस्ता रचनात्मक कार्यक्रमहरू देशभर सञ्चालन गरिनेछन् । विचार मिल्ने अग्रगामी राजनीतिक शक्तिसँग सहकार्य विस्तार गर्न उपाध्यक्ष दुर्गा सोबको नेतृत्वमा राजनीतिक संवाद समिति गठन गरिएको छ । समितिमा उपाध्यक्ष मानुषी यमी भट्टराई, महासचिव सोनाम सिङ स्याङ्तान र जी. एस. गुरुङ सदस्य रहेका छन् ।

बैठकको समापनमा अध्यक्ष डा. भट्टराईले, “देश ढिलोचाँडो वैकल्पिक राजनीतिको स्पष्ट मार्गचित्रमा अघि बढ्नेछ । हामी नयाँ विचार र दृष्टिकोणसहित जनतामाझ पुग्नेछौं,” भन्दै सबै पदाधिकारीलाई सक्रिय सहभागिताको लागि आह्वान गरेका थिए ।