टोखा, काठमाडौं । टोखा नगरपालिका वडा नं. ८ अन्तर्गत पर्ने साँङ्लेखोला करिडोर सडकको मनोहरा तिर्थ पुलदेखि इन्द्रेणी पुलसम्म कालोपत्रे गर्ने कार्य छिट्टै सुरु हुने भएको छ । वडा कार्यालयका अनुसार पछिल्लो दुई वर्षसम्मका लागि सडक खन्ने सिफारिस नगरिने जनाएको छ ।

कालोपत्रेपछि सडक खन्ने, ढल, खानेपानी लगायतका संरचना निर्माणका कारण सडक खण्डमा पर्ने क्षति रोक्ने उद्देश्यले यो निर्णय गरिएको हो ।

वडा अध्यक्ष रमेश खत्रीले सडक दीर्घकालीन र गुणस्तरीय बनाउन यो निर्णय आवश्यक भएको र जनताको कर तथा सरकारी खर्चबाट निर्माण हुने संरचना पटक–पटक भत्किनु दुरुपयोग हो । अब काम व्यवस्थित रूपमा, समयमै र योजनाबद्ध भएर हुन्छ, उनले भने ।

उनका अनुसार आवश्यक संरचना निर्माण गर्नुपर्ने भएकाले स्थानीयलाई १५ दिनभित्र सिफारिसका लागि छुट समय दिइएको छ । त्यसपछि कुनै पनि कारण देखाई सडक खन्ने अनुमति नदिइने उनले स्पष्ट पारे ।

खत्रीले थपे, “यो सडक वडा नं. ८ का धेरै बस्ती र व्यापारिक क्षेत्रमा राहत पुर्‍याउने छ। कालोपत्रेपछि धुलो, हिलो र दुर्घटना जोखिम कम हुनेछ । स्थानीयवासी, वडा नागरिक तथा निर्माण निकाय सबैको सहयोग मिल्यो भने काम छिटो र गुणस्तरीय रूपमा सम्पन्न हुन्छ ।”