काठमाडौं । शिक्षा विज्ञान तथा प्रविधिमन्त्री विद्या भट्टराईले असिमित ज्ञान र विचारहरुलाई एक ठाउँमा जोड्नसके हरेक मानिसको जीवन फराकिलो हुने बताउनु भएको छ । यसका लागि असिमित ज्ञान उपलब्ध गराउन सरकारको भूमिका प्रभावकारी हुनुपर्ने पनि बताउनु भयो ।

शुक्रबार काठमाडौंमा आयोजित किताब जात्राको छैटौं संस्करणको उद्घाटन समारोहलाई सम्बोधन गर्दै उहाँले किताब जात्राले ज्ञानको दायरा फराकिलो बनाउने धारणा राख्दै यस्तो अभियानलाई अगाडि बढाउनु सरकारको पनि दायित्व रहेको बताउनु भयो ।

उहाँले भन्नुभयो,‘सिमित ज्ञानले मानिसको सोचाइलाई सिमित बनाउँछ । जति असिमित ज्ञान र विचारहरुलाई एक ठाउँमा जोड्न सक्छौ, त्यसले हरेक मानिसको जीवनलाई फराकिलो बनाउँछ । यस्ता अभियानलाई अगाडि बढाउनु सरकारको पनि दायित्व हो । एउटा व्यक्तिले आफ्नो ज्ञानलाई फराकिलो बनाउँछु भन्दा राज्य र सरकारले त्यो उपलब्ध गराउनुपर्ने दायित्व हो । त्यसमा लाग्ने प्रतिवद्धता पनि जनाउँछु । ’

उहाँले केही कमाईदैं कमाईदैन भने किन पढ्न ? भन्ने भाष्य निर्माण भइरहेको भन्दै उनले स्थापित मान्यतालाई नयाँ ढंगले परिस्कृत गर्न किताब जात्रा कार्यक्रमले सहयोग गर्ने विश्वास व्यक्त गर्नु भयो ।