टोखा, जेठ २४ । “स्वच्छ नदी, स्वस्थ जीवन” भन्ने नाराका साथ सञ्चालित नदी सरसफाई अभियानको ५४औं हप्ताको कार्यक्रम आज बिहान सफलतापूर्वक सम्पन्न भएको छ। सरसफाई कार्यक्रम टोखा नगरपालिका–११ स्थित मनोहरतीर्थ पुलनजिक बिहान ६ः३० बजेबाट सुरु भएको थियो ।

कार्यक्रममा स्थानीय बासिन्दा, युवाहरू, समाजसेवी, जनप्रतिनिधि तथा विभिन्न संघसंस्थाका प्रतिनिधिहरूको उत्साहजनक उपस्थिति रहेको थियो । सहभागिहरूले नदी किनार तथा वरपरका क्षेत्रमा फोहोरमैला संकलन गरी वातावरण सफा राख्नमा सक्रियता देखाएका थिए ।

टोखा नगरपालिकाको सहकार्यमा सञ्चालन हुँदै आएको यो अभियानले नदी तथा वातावरण संरक्षणमा समुदायको सहभागिता र जनचेतनालाई सशक्त बनाउँदै आएको छ । आयोजक टोलीले हरेक हप्ता नियमित रूपमा सरसफाई अभियान सञ्चालन गर्दै आइरहेको र आगामी हप्तामा पनि निरन्तरताका साथ अभियान अगाडि बढ्ने जानकारी दिएको छ ।

कार्यक्रमको समापनमा सहभागी सबैप्रति धन्यवाद व्यक्त गर्दै वातावरण संरक्षणको अभियानमा निरन्तर साथ र समर्थन जनाउन आयोजकहरूले आह्वान गरेका थिए ।