नुवाकोट । विदुर नगरपालिकाको मेयर राजन श्रेष्ठको पहल र नेतृत्वमा आयोजित KORA CYCLING CHALLENGE–2025 भव्य रूपमा सम्पन्न भएको छ । शारीरिक स्वास्थ्य, धार्मिक–साँस्कृतिक सम्पदाको संरक्षण, पर्यटन प्रवर्द्धन र वातावरणमैत्री यात्राको संदेश बोकेको यस अभियानमा १५० भन्दा बढी साइकल यात्रीहरूको उत्साहजनक सहभागिता रहेको थियो ।

नगरपालिकाको कार्यालयबाट सुरु भई बनदेवी, इन्द्रचोक, स्वयम्भु चैत्य, साततले दरबार, भैरवीदेवी मन्दिर, धरमपानी, बाराही मन्दिर, बट्टार पुरानोपाटी हुँदै १३ किलोमिटर लामो यात्रा नगर कार्यालयमै पुगेर सम्पन्न भएको हो । मेयर श्रेष्ठले स्वयम् अग्रपंक्तिमा उभिएर साइकल यात्रा सञ्चालन गरे ।

उनले यस्ता अभियानहरू नगरको समग्र पहिचान, नागरिकको स्वास्थ्य, सम्पदा संरक्षण र वातावरणीय चेतनाका लागि अत्यन्तै आवश्यक रहेको बताए । "साइकल यात्रा केवल शारीरिक अभ्यास होइन, हाम्रो जीवनशैली सुधार गर्ने र नगरलाई स्वच्छ, हरित र सचेत बनाउने अभियान हो," मेयर श्रेष्ठले भने ।

उनको दूरदर्शिता र सक्रिय नेतृत्वले नगरवासी तथा युवा पुस्तालाई सन्देशमूलक यात्रा तर्फ आकर्षित गर्न सफल भएको सहभागिहरूले प्रतिक्रिया दिएका छन् ।