काठमाडौं । ईशान बाल तथा महिला अस्पतालले आफ्नो ३०औं वार्षिकोत्सव विशेष समारोहका साथ सम्पन्न गरेको छ। तीन दशक लामो सेवायात्राको स्मरणमा आयोजित कार्यक्रममा चिकित्सक, स्वास्थ्यकर्मी, कर्मचारी, समुदायका प्रतिनिधि तथा अभिभावकहरूको उल्लेखनीय सहभागिता रह्यो। कार्यक्रममा संस्थापक सदस्यहरूले अस्पताल स्थापना गर्दा भोगिएका चुनौती र कठिनाइहरूबारे अनुभव साझा गर्दै अस्पतालले बालबालिका र महिलाको स्वास्थ्य क्षेत्रमा पुर्‍याएको योगदानलाई स्मरण गरे ।

समारोहको मुख्य आकर्षण दीर्घकालीन रूपमा सेवा दिएका चिकित्सक र स्वास्थ्यकर्मीप्रति गरिएको सम्मान थियो। अस्पताल प्रशासनले ३० वर्षदेखि निरन्तर खटिएका कर्मचारीलाई दोसल्ला, सम्मानपत्र र स्मृति चिन्ह प्रदान गर्दै कृतज्ञता प्रकट गर्‍यो। सम्मान ग्रहण गर्ने क्रममा चिकित्सकहरूले आफ्नो जीवनलाई मातृ–शिशु स्वास्थ्य सुरक्षामा समर्पण गर्न पाएकोमा गर्व व्यक्त गर्दै आगामी दिनमा अझ जिम्मेवारीपूर्वक सेवा गर्ने प्रतिबद्धता जनाए ।

त्यस अवसरमा बालबालिकाहरूले प्रस्तुत गरेका गीत, नृत्य र सांस्कृतिक कार्यक्रमहरूले वातावरणलाई झन् जीवन्त बनाए। केही अभिभावकहरूले आफ्ना अनुभव सुनाउँदै अस्पतालको उपचार सेवाले बच्चाको जीवन बचाएको प्रसंग स्मरण गर्दा उपस्थितहरू भावुक बने । अस्पताल प्रशासनले विगत तीन दशकमा सञ्चालन गरिएका निःशुल्क स्वास्थ्य शिविर, मातृ–शिशु स्वास्थ्य सचेतना कार्यक्रम, ग्रामीण क्षेत्रमा खोप अभियानलगायतका गतिविधि प्रस्तुत गर्दै आगामी दिनमा आधुनिक प्रविधि र दक्ष जनशक्ति थपेर सेवा विस्तार गर्ने योजना सार्वजनिक गर्‍यो ।

समापन भाषणमा अस्पतालका निर्देशकले भने, “३० वर्ष हाम्रो लागि मात्र इतिहास होइन, भविष्यतर्फको मार्गदर्शन हो । अबको यात्रा अझ आधुनिक र सर्वसुलभ स्वास्थ्य सेवातर्फ हुनेछ ।”