भक्तपुर । भक्तपुर नगरप्रमुख सुनिल प्रजापतिले विद्यार्थीमा पठन संस्कृतिको विकासलाई प्राथमिकता दिँदै नगरपालिकाले पुस्तकालयको व्यवस्थापनलाई निरन्तर अघि बढाइरहेको बताएका छन् ।

अठारौँ पुस्तकालय दिवसका अवसरमा भक्तपुर नगरपालिकाले आयोजना गरेको कार्यक्रममा सभापति प्रजापतिले स्थानीय सरकार सञ्चालन ऐन २०७४ ले पुस्तकालय र वाचनालय सञ्चालनको अधिकार पालिकालाई दिएको उल्लेख गर्दै, नगरका पुस्तकालय तथा वाचनालयको अभिलेख संकलन गरी आवश्यकताअनुसार सुधार र व्यवस्थापन गर्ने कार्य भइरहेको जानकारी दिए ।

उनले पुस्तकालय दिवसलाई नियमित रूपमा मनाउँदै आएकोमा यसले विद्यार्थीलाई पुस्तकप्रतिको रुचि बढाउन मद्दत गर्ने विश्वास व्यक्त गरे ।

सोही कार्यक्रममा नेपाल मजदुर किसान पार्टीका अध्यक्ष नारायणमान बिजुक्छेँ (रोहित)ले पुस्तक आफैँमा एउटा इतिहास भएको उल्लेख गर्दै अध्ययनविना बौद्धिक प्रगति असम्भव हुने धारणा राखे । नेपालमा विसं २०६५ देखि प्रत्येक वर्ष भदौ १५ गते पुस्तकालय दिवस मनाइँदै आएको छ ।