काठमाडौं । भारतीय सेनाले पाकिस्तान र पाकिस्तान प्रशासित कश्मीरमा आक्रमण गरेको छ । भारत सरकारले एक विज्ञप्ति जारी गर्दै सेनाले “अपरेशन सिन्दूर” सुरु गरेको बताएको छ। भारत सरकारले आफ्नो विज्ञप्तिमा भनेको छ, “यो कारबाहीले पाकिस्तान र पाकिस्तान प्रशासित कश्मीरमा रहेको आतंकवादी पूर्वाधारलाई लक्षित गरेको छ, जहाँबाट भारतमा आतंकवादी हमलाहरूको योजना बनाइएको र कार्यान्वयन गरिएको थियो।”

विज्ञप्तिमा “कुल नौ स्थानहरूलाई लक्षित गरिएको” पनि भनिएको छ। अर्कोतर्फ, पाकिस्तानको सरकारी टेलिभिजनले सेनाका प्रवक्तालाई उद्धृत गर्दै भारतीय सेनाले पाकिस्तानमा तीन स्थानमा मिसाइल आक्रमण गरेको बताएको छ।

पाकिस्तानी सेनाले बीबीसीलाई बताएअनुसार भारतीय आक्रमणमा दुई बालबालिकासहित सात जनाको मृत्यु भएको छ । समाचार एजेन्सीहरू रोयटर्स र एएफपीले भारतीय सेनालाई उद्धृत गर्दै कश्मीरमा पाकिस्तानी सेनाको गोलीबारीमा तीन भारतीय नागरिकको मृत्यु भएको बताएका छन्।

आक्रमण सुरु भएपछि संयुक्त राष्ट्रसंघका महासचिव एन्टोनियो गुटेरेसका प्रवक्ताले भनेअनुसार गुटेरेस नियन्त्रण रेखा र अन्तर्राष्ट्रिय सीमापारि भारतीय सैन्य कारबाहीप्रति गहिरो चिन्तित छन्।

एन्टोनियो गुटेरेसका प्रवक्ता स्टेफेन डुजारिकले भने, “उनी (एन्टोनियो गुटेरेस) ले दुवै देशलाई अधिकतम सैन्य संयम अपनाउन अपील गरेका छन्। विश्वले भारत र पाकिस्तान बीचको सैन्य टकराव सहन सक्दैन।”

यसअघि मे ५ मा, गुटेरेसले एक्समा पोस्ट गरेका थिए – “भारत र पाकिस्तानबीचको तनाव धेरै वर्षयताकै उच्चतम बिन्दुमा छ। म अप्रिल २२ मा पहलगाममा भएको भयानक आतंकवादी हमलाको कडा निन्दा गर्दछु।”

अमेरिकी विदेशमन्त्री मार्को रुबियोले अमेरिकाले परिस्थितिमाथि नजर राखिरहेको बताएका छन् । “म भारत र पाकिस्तानको अवस्थालाई नजिकबाट नियालिरहेको छु,” मार्को रुबियोले सामाजिक सञ्जाल प्लेटफर्म एक्समा पोस्ट गरे ।

उनले थप लेखे, “म राष्ट्रपति डोनाल्ड ट्रम्पको टिप्पणीसँग सहमत छु कि यो चाँडै अन्त्य हुनुपर्छ र शान्तिपूर्ण समाधानको लागि भारतीय र पाकिस्तानी नेतृत्व दुवैसँग वार्ता जारी राख्नेछु।”