काठमाडौं । कोरोना महामारीपछि विदेशबाट फर्केर गाउँमै पशुपालन व्यवसाय सुरु गर्ने प्रवृत्ति बढेको छ । विदेशमा दशकौँ बिताएका युवाहरू महामारीका कारण फर्किएपछि गाउँमै नयाँ उद्यमको बाटो रोज्न थालेका छन् ।

बागलुङको जैमिनी नगरपालिकामा एक किसानले भैँसी, गाई, बाख्रा र कुखुरा पालेर फार्म सञ्चालन गरिरहेका छन् । सुरुवातमा ११ भैँसी, एक गाई, २५ बाख्रा र ५० कुखुरासहित सुरु गरिएको फार्मबाट दैनिक करिब ९० लिटर दूध उत्पादन हुँदै आएको छ । उत्पादन भएको दूध किसान आफैंले बजारमा पुर्याउने गरेका छन् ।

वार्षिक २० हजार रुपैयाँ भाडामा तीन रोपनी जग्गा लिएर सुरु गरिएको फार्ममा हालसम्म करिब ५० लाख रुपैयाँ लगानी भइसकेको छ । मासिक करिब दुई लाख ४० हजार रुपैयाँ आम्दानी हुने गरेको किसानले बताएका छन् ।

नगरपालिकाले समेत घाँस टुक्रयाउने र पानी तताउने उपकरण उपलब्ध गराएर सहयोग गरेको छ । यसरी गाउँमै बसेर परिवारसहित उद्यम सञ्चालन गर्दा विदेशमा भन्दा बढी आनन्द मिलेको किसानको अनुभव छ ।